وعد .. «شعر» لـــ أمانى محفوظ

جددنى..

ومددنى على شُطآن

فارشهالى بورق الورد..

■ ■ ■

وقول كام وعد ف ودانى

لا يوم ترحل

ولا تسيبنى

ولا يا حبيبى تنسانى..

■ ■ ■

وحددنى بقلم عمرك

فى صورة راسمها علشانى..

■ ■ ■

وعددنى

فى كل مشاهد اتمنيتها ف الأنثى

وسيبنى اهديك مَشاهد حُب لا تُنسى..

■ ■ ■

واجذبنى كما القطة

بكام نقطة

من العطر اللى خلانى

أتوه واغرق ف بحر هواك..

■ ■ ■

واخوض جوه الخيال واحلم

بليلة جديدة أعيشها معاك..

■ ■ ■

دفاك فيها يبددنى

ويمحيني

وترجع إنت تِحيينى..

■ ■ ■

ومن تانى..

تجددنى..

تحددنى..

وتوعدنى

لا ترحل يوم

ولا تسيبنى

ولا يا حبيبى تنسانى..